Punëtori mbi Koordinimin e Aktiviteteve për Menaxhimin e Qëndrueshëm të Pyjeve Në Qendrën e Aftësimit Profesional për Pylltari në Blinajë është mbajtur një punëtori e rëndësishme, e organizuar nga Organizata për Ushqim dhe Bujqësi e Kombeve të Bashkuara (FAO) në bashkëpunim me Agjencinë Pyjore të Kosovës.
Qëllimi i këtij takimi ishte diskutimi dhe koordinimi i aktiviteteve rreth planit të punës për vitin 2025, si dhe forcimi i bashkëpunimit ndërmjet Agjencisë Pyjore të Kosovës dhe FAO-së në kuadër të projektit “Mbështetje në fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe për të adresuar ndryshimin klimatik në Kosovë”, i cili financohet nga Ambasada e Suedisë dhe Komisioni Evropian. Gjatë punëtorisë, pjesëmarrësit diskutuan rreth strategjive për menaxhimin e qëndrueshëm të pyjeve, përmirësimin e infrastrukturës dhe fuqizimin e kapaciteteve institucionale për të siguruar mbrojtjen dhe shfrytëzimin e qëndrueshëm të burimeve pyjore.Një fokus i veçantë iu dha përmirësimit të bashkëpunimit ndërinstitucional dhe zbatimit të projekteve të përbashkëta që synojnë ruajtjen e biodiversitetit dhe adresimin e sfidave të ndryshimeve klimatike.
Agjencia Pyjore e Kosovës dhe FAO riafirmuan angazhimin e tyre për të vazhduar bashkëpunimin dhe për të siguruar që politikat dhe veprimet në sektorin e pylltarisë të mbështesin zhvillimin e qëndrueshëm dhe përmirësimin e jetesës në zonat rurale të Kosovës. Ky takim shënon një hap të rëndësishëm drejt forcimit të menaxhimit të pyjeve dhe implementimit të praktikave më të mira në këtë fushë.
